حافز

hafez

بە ته‌رگؤمه‌و سیامه‌ند هۆرامی

حافز ـ18
ساقی گیان عه‌یدا و دڵ ئامان مه‌بارک بادت
به‌شکه‌م ئا وادې که‌ ها دێت نه‌شا جه‌ یادت
لامۆ شگفتا‌ کې بې چا ماۉه‌و دوریه‌نه‌‌
لې حه‌ریفانه‌ دڵ به‌رې و بیه‌ بې دڵدادت
بیاۉنه‌ ۉله‌و ڕه‌زې به‌نده‌گی و ۉاچه‌ بؤ و بزیه‌ ‌
که‌ ده‌م و، هیممه‌تو ئېمه،‌ که‌رده‌ن ئازادت
شادی مه‌جلسیا ئینا ڕا و مه‌قده‌مو تؤنه‌‌‌
کؤگاو خه‌ما بؤ ئا دڵه‌ نه‌وازؤ‌ شادت
شؤکر تاراجو خه‌زانی نه‌تاۉاش گه‌زؤ
بؤیسانو سه‌مه‌نی و سه‌رۉو گؤل و شمشادت
چه‌مو به‌دی دور، گېڵنایشۆ، چا ته‌فره‌قه‌یه‌
تاڵه‌ی ناموه‌ر و، دۆڵه‌تی، ئه‌دایی زادت
حافز دۆڵه‌تو، ئا گه‌می، نوحیه‌ ۉه‌رمه‌ده‌
ئه‌ر نا توفانو، حادسا، که‌نؤ و به‌رؤ بنیادت
ــــــــــــــــــــــــــ
حافز ـ 17
سینه‌ ئێرو دڵیه‌نه به‌ خه‌مو گیانانه‌ی سؤت
ئێرېۉ بې چی یانه‌نه، ‌پۆش گردو، کاشانه‌ی سؤت
جه‌سه‌م جه‌ تاۉو دوری، دڵبه‌رې شی و تاۉیاره‌
گیانم به‌ شؤڵه‌ مېهرو روخسارې گیانانه‌ی سؤت
سؤ دڵی بدیه‌ گڕه‌و ئه‌شکانه،‌ دڵو شه‌مې
دوش په‌یم سه‌رو مېهریۆ چون په‌ڕو په‌رۉانه‌ی‌ سؤت
ئاشنێۉی نه‌ غه‌ریبا که‌ دؤس و دڵسؤزو منا
چون من جه‌ خوېشی ۉیه‌ردا په‌یم دڵو بېگانه‌ی سؤت
خرقه‌و زوهدو من ئاۉه‌و خراباتی پېچاۉه‌ و به‌رد
یانه‌و عه‌قڵو من لۉا و به‌ ئێرو مه‌یخانه‌ی سؤت
چون پیاڵه‌ جه‌ تؤبېۉی که‌ که‌ردم دڵم مه‌ڕیا
لاله‌ ئاسا یه‌هه‌رم بې مه‌ی و خمخانه‌ی‌ سؤت
گېچه‌ڵ بازه‌ گېڵۆ لې مه‌ردمو چه‌مانه‌ من
خه‌رقه‌م سه‌ره‌ره‌ ۉه‌ژیا و به‌ ڕه‌سمو شوکرانه‌ی‌ سؤت
حافز ته‌رکو ئه‌فسانه‌ی بؤ ۉاچه و مه‌ی ده‌‌ ده‌مېۉ‌
نه‌وتیمې و هه‌ستی شه‌مې شی و چه‌نی ئه‌فسانه‌ی سؤت
ــــــــــــــــــــــــ
حافز ـ 16
خه‌مېۉ ئه‌برؤ شؤخو تؤ لې‌ که‌مانی ۉست
په‌ی گیانو زارو منی سؤته‌و ناته‌ۉانی ۉست
نه‌قشو دۉه‌ دنیای نه‌بې ڕه‌نگه‌و ئولفه‌تی بې
زه‌مانه‌ی ته‌رحه‌و دؤسیش هه‌ر ئا زه‌مانی ۉست
به‌ کرشمېۉ که‌ نه‌رگسی په‌ی‌ وې ۉره‌ته‌ی نمانا
چه‌مې تؤ سه‌د فتنه‌شا یه‌ک ئان لې جه‌هانی ۉست
شه‌راب وارده‌ و خؤی که‌رده‌ مزیه‌یه‌نه‌ ئۆ چه‌مه‌ن
که‌ ئاۉه‌و ڕوه‌و تؤنه‌ ئێرش ئۆ ئه‌رخه‌وانی ۉست
جه‌ به‌زمگاو چه‌مه‌نیه‌نه‌ هیش مه‌س ۉیه‌ردا
که‌ خونچه‌ی ده‌مو تؤش لامۆ لې گؤمانی ۉست
ۉه‌نۆشه‌ توڕه‌ی مه‌فتولو وېش گرې دې
سه‌با حه‌کایه‌تو زڵفو تؤش ئه‌نه‌ میانی ۉست
شه‌رمو ئانه‌یه‌نه‌ که‌ به‌ روه‌و تؤم نسبه‌ت دا
سه‌مه‌ن به‌ ده‌سو سه‌بای خاکش ئه‌نه‌ ده‌هانی ۉست
من ۉه‌رو‌ وه‌رعې مه‌ی و موتربم نه‌بې چێۉه‌ڵ
هه‌ۉاو موغبه‌چام ئه‌نه‌ ئین و ئانی ۉست
ئیسه‌ به‌ ئاۉه‌و مه‌یې لاڵې خرقه‌ شؤرونه‌
نه‌سیبی ئه‌زه‌لیا و مه‌شیؤنه‌ش جه‌ شانی ۉست
مه‌ر گوشایشو حافزی ئه‌چی خرابه‌نه‌ بې
که‌ به‌خششو ئه‌زه‌لیش ‌لې باده‌و موغانی ۉست
جه‌هانم به‌ کام گنؤ ئیس که‌ دۆرو زه‌مانی
منش ئه‌نه‌ به‌نده‌گی خواجه‌و جه‌هانی ۉست

15ـ
ئه‌ی شاهدی قودسی کې کېشؤ به‌ن جه‌ نیقابیت
وه‌ی مه‌لی به‌هه‌شتی کېن خه‌موه‌رو دانه‌و ئاۉیت
وه‌رمم جه‌ دیده‌ تؤریا چی ۉیره‌ جه‌رگ سؤچنه‌نه‌
که‌ کامه‌ باوشی بیه‌ به‌ یاگې ئاسایش و خاویت
جه‌ ده‌روېشی مه‌په‌رسی و ته‌رسو جه‌ ده‌ست دێبا
ئه‌ندیشه‌و ئامؤرزشی و په‌رۉاو خاسه‌و‌ سه‌وابیت
داشا راو دڵو عاشقا ئا چه‌مه‌ خومارینا‌
ئه‌پی شېۉه‌ گنؤ به‌ر راده‌و مه‌سی شه‌رابیت
تیرېۉه‌ که‌ به‌ غه‌مزه‌ شات په‌ی دڵیم خه‌تا لۉا
تا باز که‌ چ ئه‌ندیشه‌ که‌رؤ ۉیرو ڕاو سه‌وابیت
ناڵه‌ و فه‌ریادم ناستۆ و که‌چی تؤ هه‌ر نه‌ژنه‌ۉیت
چېگۉ پېدان نگارا که‌ چند به‌رزا جه‌نابیت
سه‌راو ئه‌چی بادیۆ هه‌ر یه‌کجار دورا زینهار
که‌ غولی بیابانی نه‌فریۉنؤ په‌ی سه‌رابیت
تا ڕاو پیریه‌نه‌ به‌ کام ئایین بلی ئه‌ی دڵ
باری به‌ غه‌ڵه‌ت سه‌رف بی گه‌نج و واده‌‌و شه‌بابیت
ئه‌ی قه‌سره‌ دڵفروزه‌کې که‌ مه‌نزڵگه‌و مؤیمه‌نی
یاره‌ب ئافه‌تو دۆری ده‌سش نه‌لؤنه‌ خرابیت
حافز غؤڵامېۉ نیا که‌ جه‌ خاجه‌یش به‌ربشؤ
سڵحېۉه‌ که‌ره‌ و گېڵۆ پڕچیانا جه‌ عېتابیت
ــــــــــــــــــــــــــــــــــــ
14
ۉاتم ئه‌ی سڵتانه‌و خاسا ره‌حمت بؤ به‌ منی ده‌ردینی
ۉاتش شؤنه‌و دڵیۆ راش گمه‌نه‌ غه‌ریبی مسکینی
ۉاتم مه‌ۉیه‌ره‌ تؤ ده‌مېۉ ۉاتش نا مشیؤ به‌خشینه‌
یانه‌ په‌رۉه‌ر تاۉ نمارؤ تا به‌رؤ خه‌مو چندینی
سه‌رو مه‌خمه‌ڵی شاهیۆ نازېۉه‌ی وتې که‌ی خه‌مشا
که‌ خار و خاره‌ش بؤ غه‌ریب نه‌ جیای یاگه‌و باڵینی
ئه‌ی که‌ ئه‌ڵقې زڵفیته‌نه‌ ڕاو کؤگاو چندین ئاشنایان
ئا مشکینه‌ خاڵې وه‌ش داش ئۆ دیمی غه‌ریب ڕه‌نگینی
مرمانؤ عه‌کسو مه‌ی ڕه‌نگه‌و دیمه‌نی مانگوه‌شېته‌نه‌
هه‌مچون به‌رگو ئه‌رخه‌ۉانی غه‌ریب پۆ سه‌فحه‌و نه‌سرینی
هه‌ر فره‌ غه‌ریب کۆتېنه‌ ئا مؤرخه‌تې ئۆ دۆرو روېت
هه‌ر چند نگارستانه‌نه‌ ئاشنانه‌ خه‌ته‌ی مشکینی
ۉاتم ئه‌ی شامو غه‌ریبا تاو توڕه‌و شه‌ۉه‌ ڕه‌نگو تؤ
سه‌ر ساعبانه‌ی په‌رېز که‌ره‌ جه‌ غه‌ریب ناڵه‌و حه‌زینی
ۉاتش حافز ئاشنێما گرد گیرې ڕاو حیره‌تیه‌نې‌
هیچ دور نیا ئه‌ر ۉزؤنه‌ غه‌ریبی خه‌سه‌ی خه‌مینی
ــــــــــــــــــــــــــــــــــ
١٣
ساعبی تنگناشۆ و کڵه‌شا به‌س هۆرا
ساعبا ساعبانه‌ ساعبا ساعب یارا
شۆنم چکیؤنه‌ گؤناو لاله‌یۆ
شه‌راب هه‌ی شه‌راب شه‌راب دؤسدارا
شنیؤ چه‌مه‌نۆ سؤ ۉاو به‌هه‌شتی
ها نؤشدې ده‌م ده‌م باده‌ی گه‌وارا
ۉلی زموڕؤد ته‌ختش هؤردانۆ
راح چون ئێرین لاڵ وېش مدؤ سارا
به‌ره‌و مه‌یخانه‌ی هه‌م دیس بینیاۉه‌
به‌ش گؤشاد که‌ری شاو شیرین کارا
ده‌م و ددانېت مزه‌ مه‌کشا هه‌ن
جه‌ گیانی برژیاو سینه‌و زامدارا
ئه‌چی فه‌سڵه‌نه‌ هه‌ر فره‌ سه‌مه‌ره‌ن
به‌رې مه‌یکه‌دا پېسه‌ هؤرۉیارا‌
رو به‌ ڕو ساقی په‌ری په‌یکه‌رې‌
حافزوار نؤشه‌ باده‌ی جام ئارا
ـــــــــــــــــــــــــــــــــــــــــ
ـ١٢
ئه‌ی شۆقو مانگه‌و حؤسنی جه‌ دیمو ره‌خشانو شمه‌
چه‌مه‌و ئاۉه‌ڕو خاسی جه‌ چاڵه‌و زه‌نه‌خدانو شمه ‌
عه‌زمو دیدارو تؤش هه‌ن گیانی به‌ له‌ب ئاما‌ما
گېڵؤۉه‌ یا که‌ به‌ر بێ چېش ماچؤ فه‌رمانو شمه
که‌س لا نه‌رگسیته‌نه‌ سڵامه‌ت نه‌لا و به‌ر نه‌شی
خاس ئانه‌نه‌ مه‌ستوری نه‌ۉره‌شا به‌ مه‌ستانو شمه
به‌خته‌ی وه‌رمائاڵؤسینه‌و ئېمه‌ هایش بؤۉه‌ ئجؤ
چون ئاۉېۉه‌ش دا ئۆ چه‌م وه‌ش گؤنای ره‌خشانو شمه
هامڕا سه‌بای کیانه‌ جه‌ روېت پېچیا گوڵده‌سېۉ
تا به‌ش بوېۉه‌ بژنه‌ومې جه‌ خاکو بؤیسانو شمه‌
عه‌مرتا بؤنه‌ و مراد ئه‌ی ساقیا به‌زمخانه‌و جه‌می
هه‌رچند که‌ جامو ئېمه‌ په‌ڕ نه‌بی به‌ دۆرانو شمه‌
دڵ خه‌ریکو خرابه‌یا دڵدارې ئاگا که‌ردېۉه‌
ئامان سه‌د ئامان دؤسا گیانو من و گیانو شمه ‌
ئی غه‌ره‌زه‌ که‌ی ده‌س مدؤ یا ره‌ب که‌ هامده‌سې گنا
خاتره‌ی جه‌مه‌و ئېمه‌ و تاو زڵفو په‌رېشانو شمه‌
دامه‌ن جه‌ خاک و ونې دور گېره‌ که‌ لۉای سه‌رمانه‌
که‌ لې ئی رێنه‌ کوشتی فرېنې قوربانو شمه‌
که‌رؤ حافز دؤعێۉه‌ گؤش داره‌ و ئامېنېۉ ۉاچه‌
به‌ش به‌ ڕسقو ئېمه‌ بؤ ئا لاڵه‌ شه‌که‌ر شانو شمه
هۆ سه‌با چېمۆ ۉاچه‌ به‌ ساکنا شارو یه‌زدی
ئه‌ی سه‌ره‌و حه‌ق نه‌شناسا په‌ڕ گۉه‌و گؤچانو شمه
گه‌ر چی به‌ساتما چۆۉه‌ فره‌ دورا هیممه‌ت دور نیا
هه‌م به‌ندې شاو شمه‌نمې و هه‌م دؤعا وانو شمه ‌
تؤ ئه‌ی شاهه‌نشای بوڵه‌ند هه‌ساره‌ په‌ی خؤدای هیمه‌تېۉ
تا چون ئه‌خته‌ر ماچ که‌رو ئا به‌رو هه‌یوانو شمه‌
ــــــــــــــــــــــــ
١١
ساقی به‌ نورو باده‌ی گیسنه‌نه‌ جامو ئېمه‌
موترب ۉاچه‌‌ که‌ جه‌هان ها بی به‌ کامو ئېمه‌ ‌‌
ئېمه‌جه‌ پیاڵه‌نه‌ ۉېنه‌و یاریما دیه‌ن
ئه‌ی بې خه‌به‌ر جه‌ وه‌شی نؤش و مودامو ئېمه‌
هه‌رگیز مه‌مرؤ ئانه‌ که‌ دڵش زینده‌ بیۆ به‌ عېشق
جه‌ریده‌و عاله‌میه‌نه‌ سه‌بتا ده‌ۉامو ئېمه‌
هه‌ر ئانده‌نه‌ کرشمه‌ و نازو ئی سه‌هی قه‌دا
که‌ ئا سه‌رۉې بزیؤنه‌ ئۆ به‌ر و بامو ئېمه‌
ئه‌ی هه‌ۉا ئه‌ر گوڵشه‌نو ئازیزانه‌ ۉیه‌ردی
ئامان بیاۉنه‌ به‌ چون گیانا په‌یامو ئېمه‌
ۉاچه‌ نامې ئېمه‌ چی به‌ ئه‌نقه‌س جه‌ یاد به‌رې
وېش مێ که‌ یادېۉ ناری جه‌ یاگه‌ و نامو ئېمه‌
مه‌سی چه‌مو شاهدو دڵبه‌ندو ئېمۆ وه‌شا
پۆکه‌‌ی ئه‌سپارانشا به‌ مه‌سی زه‌مامو ئېمه‌
ته‌رسو نه‌به‌رؤ سه‌رفېۉ ڕؤ بازارو بازخواستی
نانو حه‌ڵالو شېخی جه‌ تاڵ حه‌رامو ئېمه‌
حافز جه‌ دیده‌ دانه‌ هه‌رسېۉه‌ باره‌و مجه‌
به‌شکه‌م مه‌لو وساڵی‌ کېشیؤ په‌ی دامو ئېمه‌
ده‌ریاو سۆزو فه‌له‌کی و گه‌می به‌رزو هېلالی
بیې نقمې نعمه‌تو حاجی قوامو ئېمه‌
ــــــــــــــــــــــــــــــ
١٠
دوش مزگیۆ ڕوه‌و مه‌یخانه‌ کېشیا پیرو ئېمه‌
چېش بؤ یارا ته‌رېقه‌ی چێۉلای ته‌کبیرو ئېمه‌
ئېمه‌ مریدې په‌ی قیبله‌ی روه‌ چه‌نی بارمې که‌
ڕوه‌ په‌ی یانه‌و خه‌مماری به‌رؤنه‌ پیرو ئېمه‌
خه‌راباتې ته‌رېقه‌ی هام مه‌نزڵېما که‌راۉه‌
که‌ ڕؤ ئه‌زه‌ڵی پېسه‌ نریان ته‌قدیرو ئېمه‌
عه‌قڵ ئه‌ر زانێش دڵ به‌ندو زڵفاشه‌نه‌ چند وه‌شا
عاقڵې دېۉانې گنېنې شؤنه‌و زنجیرو ئېمه‌
ڕوه‌ی خاسه‌ت پاسه‌ ئایېۉ جه‌ لوتف و خاسه‌یش نمانا
چا وه‌ختۆ جیا جه‌ خاسه‌ی نمارؤ ته‌فسیرو ئېمه ‌
چه‌نی دڵی سه‌نگ ئاسایت هیچ گیسیؤنه‌ شه‌ۉېۉه‌
ئاهی ئێرناک و سؤز و سینه‌و شه‌ۉگیرو ئېمه‌
تیرئاهو ئېمه‌ گه‌ردون ۉیه‌رؤ حافز خامؤش
به‌زێت بێ وېره‌ و مازه‌ بی به‌ نه‌چیرو ئېمه‌‌‌

ــــــــــــــــــــــــــــــــ
٩
گه‌رمی دۆره‌و جوانیشا هه‌م دیسانۆ بؤیسانی
میاۉؤ مژده‌و ۉلې لا بڵبڵی وه‌ش ئه‌لحانی
ئه‌ی سه‌با گه‌ر به‌ جوانا لا چه‌مه‌نی یاۉایۆ
خزمه‌تو ئېمه‌ بیاۉنه‌ سه‌رۉې و گول و رېحانی
ئه‌ر پېسه‌ وېش برمانؤ موغ به‌چه‌ی باده‌ ۉره‌ش
به‌ گزی ۉه‌رو مه‌یخانه‌ی که‌رو باقه‌و مژگانی
ئه‌ی که‌ ماری مانگۆری عه‌نبه‌رین وه‌ش گؤچانی
نگه‌ران حاڵ مه‌گېڵنه‌ ئه‌منی سه‌رگه‌ردانی
ته‌رسو ئی قۆمه‌ که‌ به‌ خېڵو دوردی کېشا خۉا
ئاخرو کاری که‌را به‌ خرابات ئیمانی
یارو مه‌ردا خؤدای به‌ که‌ جه‌ که‌شتی نؤحیه‌نه
خاکېۉ هه‌ن که‌ مه‌سانؤ به‌ ئاۉېۉه‌ توفانی
یانه‌و گه‌ردونی بزیۆ و داۉاو نانی مه‌که‌ره‌
که‌ ئی سیاۉ کاسه‌ کوشؤ جه‌ ئاخرۆ مېمانی
دمایین یاگه‌ وه‌رمو هه‌رکه‌سی مشتېۉ خاکا
ئیتر به‌ ئه‌فلاک یاۉنایش په‌ی چېشی به‌ر و بانی
وه‌ره‌ که‌نعانیه‌که‌و من مه‌سنه‌دو مسریت په‌ی بی
وه‌ختو ئانه‌یه‌نه‌ که‌ بدرود ۉاچی زیندانی
مه‌ی وه‌ره‌ و رندی که‌ره‌ و وه‌ش ویاره‌ حافز وه‌لی
دامو درۉا مه‌که‌ره‌ چون دیگه‌ران قورعانی

ـــــــــــــــــــــــــ
٨
ساقی هؤرئېزه‌ و بیاۉنه‌ جامی
خاک به‌سه‌ر که‌ره‌ خه‌مو ئه‌یامی
ساغه‌رو باده‌یم باره‌ ده‌ به‌ ده‌س
تا ۉه‌ژو ده‌ڵقی‌ ئه‌زره‌قی ۉامی
هه‌رچند به‌د نامیا لا عاقڵاۉه‌
ئېمه‌ مه‌پېکؤ سؤ نه‌نگ و نامی‌ ‌
بده‌ مه‌ی چند چی هه‌ۉاو غروریه‌
ده‌چؤر نه‌فسی‌ به‌د به‌دین فه‌رجامی
دو دوه‌و ئاه و ناڵه‌و سینه‌و من
سؤچناش خېڵو ئه‌فسورده‌ و خامی
مه‌حره‌مو ڕازه‌و دڵو شه‌یداو وېم‌
مه‌ۉینو که‌س جه‌ کؤ خاس و عامی‌
چه‌نی دلارامېۉې دڵم کریؤۉه‌‌
نازؤ دڵمه‌نه‌ زه‌ڕېۉ‌ ئارامی‌
ئیتر مه‌دیؤ په‌ی سه‌رۉه‌و چه‌مه‌نی
نگێۉ ئا سه‌رۉې دؤشه‌نه‌ دامی
سه‌برت بؤ حافز سه‌ختی شه‌ و ڕؤی
ئاقبه‌ت ڕۉېۉ ڕات ۉزؤ کامی

ـــــــــــــــــــــــ
ـ٧
سؤفی خېرا بؤ و بدیه‌ ئاۉېنه‌و سافو جامی
تا یه‌ک جار په‌یت به‌رگنؤ سه‌فاو مه‌یی لاڵ ۉامی
رازه‌و ده‌رونو په‌رده‌ی جه‌ ڕنده‌ مه‌سا په‌رسه‌
که‌ ئی حاڵشه‌ نیا لاۉه‌ زاهدی عال مه‌قامی
عه‌نقا په‌ی که‌سی ڕاۉه‌ مه‌کریؤ پېچۆ به‌سات
که‌ چا دامگانه‌ دایمه‌ ۉا به‌ ده‌سه‌نه‌ دامی
جه‌ به‌زمو دۆریه‌نه‌ سه‌ره‌و جام سه‌رکېشه‌ و لۉه‌
یانې ته‌مات نه‌بؤ به‌ وساڵی به‌رده‌ۉامی
ئه‌ی دڵ جوانی ۉیه‌رد و ۉلېۉه‌و عه‌یشیت نه‌چنیه‌
پیرانه‌سه‌ر مه‌که‌ره‌ هؤنه‌رېۉ نه‌نگ و نامی
کؤشاو عه‌یشو نه‌قدی به‌‌‌ چون ئاۉه‌وه‌ره‌ نه‌مه‌ن
ئاده‌می ئاستش جیا باخچه‌و دارالسلامی
ئېمه‌ ئاسانه‌و تؤنه‌ خزمه‌تی فره‌ما هه‌ن
ئه‌ی خواجه‌ به‌ڕه‌حم لایېۉ که‌رۆ ئۆ لا غؤڵامی
حافز مریدو جامو مه‌یېن ئه‌ی سه‌با لۉه‌و
چی به‌نده‌ییۆ به‌نده‌گی بیاۉنه‌ لا شېخو جامی

ــــــــــــــــــــــــــــــــ
٦
کې بؤ ئی دؤعێ به‌رؤ و بیاۉنؤ لا هامڕایا شای
که‌ به‌ شکرانه‌و حکمی جه‌ نه‌زه‌ر نه‌وزؤ گه‌دای
جه‌ ره‌قیبی درنج خوی په‌نا ئۆ خؤداو وېم به‌رو‌
سا به‌ش به‌رقی ئاسمانی مه‌ده‌دېۉ دؤ په‌ی خؤدای
مژې سیاۉه‌ت ئه‌‌ر داش ئیشاره‌ به‌ ونه‌و ئېمه‌
ۉریاو مه‌کریش به‌ نیگار نه‌گنی هه‌ڵه‌و لاره‌ ڕای
دڵو دنیێۉی سؤچنی ئه‌ر بێ و گؤنا به‌رۉزی
تؤ چینه‌ی چه‌ سود به‌ری که‌ مه‌که‌ری مدارای
گرد شه‌ۉای هه‌مېد که‌رو که‌ نه‌سیمو ئۆسه‌ری
به‌ په‌یامو ئاشانایا دڵنه‌ۉایی دؤ ئاشنای
چ قیامه‌تېۉا گیانه‌ که‌ به‌ عاشقات نمانا
دڵ و گیان فه‌داو روېت با پېمه‌ش‌ برمانه‌ گؤنای
به‌ خؤدا که‌ قؤمېۉ ده‌ی به‌ حافزی سه‌حه‌رخېزی
دؤعاو ساعبی گېرانه‌ و کارت ۉزؤنه‌‌ ڕاسای

ـــــــــــــــــــــــــــــــــ
٥
دڵ ها ده‌سمه‌نه‌ مشؤ خاۉه‌ن دڵا په‌ی خودای
ده‌رده‌نه‌ که‌ ڕازه‌ی نه‌هانه‌ وېش مدؤ ئاشکرای
که‌شتی مه‌ڕیاکېنمې ئه‌ی بادو شؤرته‌ی ئاخېزېۉ
تا به‌ش ۉینمێېۉه‌ جه‌ نؤ دیدارو دؤسو ئاشنای
ده‌ ڕۉه‌و مېهرو گه‌ردونی ئه‌فسانه‌ن و ئه‌فسون
خاسی به‌ جیای یارا به‌هه‌ل گېره‌ و باره‌ بجای
ئه‌ڵقې گوڵ و مڵیه‌نه‌ چۆسه‌ر وه‌ش وانې بڵبڵ
که‌ ئانا ساعب زیانه‌ ئاخېزېۉ خېڵو سکارای
ئه‌ی داراو که‌رامه‌تی به‌ شوکرانه‌و سڵامه‌تی
مېهرېۉ برمانه‌ ڕۉېۉ به‌ ده‌روېشی بېنه‌ۉای
ئاسایشو دۉه‌ دنیای ته‌فسیرو ئی دۉه‌ قسانه‌‌
چه‌نی دؤسا مروه‌ت چه‌نی دژمه‌نا مدارای
کوجیه‌و نیکنامیه‌نه‌ ئېمه‌شا گوزه‌ر نه‌دا
ئه‌ر تؤ په‌سه‌ندت نیا فه‌رماۉه‌ فاڕه‌ قه‌زای
ئا تاڵ تامه‌ که‌ سؤفی ئه‌داو پیساش ماچؤنه‌
لا ئېمۆ شیرینته‌را جه‌ ماچا ته‌رچه‌ گؤنای
به‌ هه‌نگامو ته‌نگده‌سی وېت ده‌ ئۆ عه‌یش و مه‌سی
که‌ ئی کیمیاو هه‌ستیه‌ به‌ قارون که‌رؤ گه‌دای
سه‌رکه‌ش مه‌به‌ ئه‌گه‌رنا پېسه‌ شه‌مې سؤچنؤت
دڵبه‌ره‌ که‌ مومه‌نه‌ ده‌سشۆ ته‌ۉه‌نه‌و خارای
ئایېنه‌و سکه‌نده‌ری جامو مه‌یا وه‌ش بدیه‌
تا په‌نه‌ت خاس برمانؤ ئه‌حواڵو ملکو دارای
فارسی ۉاچې زه‌ریفې به‌خشه‌ندې عه‌مریه‌نې
ساقی بیاۉنه‌ مژده‌ لا رند و پیرا پارسای
حافز وېشۆ نه‌پؤشاش ئی خه‌رقه‌ مه‌ی ئالوده ‌
ئه‌ی شېخی پؤخته‌ دامه‌ن به‌ داۉاو چه‌نه‌ ۉیه‌رای

ــــــــــــــــــــــــــ
٤
سه‌با پا غه‌زاڵ ره‌عنێ ۉاچه‌ به‌ مېهر وېت ئاسای
که‌ سه‌ر به‌ کؤ و بیابانی ئادې ئاردیمېنه‌ ڕای
شه‌که‌ر ۉره‌ش که‌ عه‌مرش درېژ بؤ چی
دلجویېۉ مه‌که‌رؤ جه‌ توتی شه‌که‌ر خای
مه‌ر غرورو حوسنیت ئیجازه‌ش نه‌دا ئه‌ی گوڵ
که‌ نه‌په‌رسات هه‌ۉاڵېۉ جه‌ عه‌نده‌لیبی شه‌یدای
به‌ خؤلق و لوتف کریؤنه‌ شکارو ئه‌هلو نه‌زه‌رې
به‌ دام و به‌ند مه‌گیریؤ و مه‌گېرا مه‌لې دانای
مه‌زانو به‌ کام سه‌به‌ب ڕه‌نگه‌و ئاشنایی مه‌دا
سه‌هی قه‌دې چه‌م سیێ لاڵه‌ له‌بې مانگ سیمای
که‌ چه‌نی نازارې منیشیه‌ره‌ و باده‌ پیمی
یادېۉ که‌ره‌ جه‌ دؤسا و جه‌ جه‌مه‌و باد پیمای
چینه‌ی زیاته‌ر مه‌گیریؤ ئاهو ئۆ جه‌ماڵو تؤ
که‌ وه‌زعه‌و مېهرو وه‌فایش نیه‌نه‌ ڕوی زیبای
ئاسمانۆ عه‌جه‌ب نیا ئه‌ر به‌ ۉاته‌و حافزی
سروده‌و زؤهره‌ی بارؤنه‌ ره‌قس و سه‌ما مه‌سېحای

ــــــــــــــــــــــــــــــ
ـ٣
گه‌ر ئا ترکه‌ شیرازیې دڵو ئېمه بارؤنه‌ ڕای
به‌ خاڵه‌ی هندیه‌ش به‌خشو سه‌مه‌رقه‌ندی و بوخارای
بده‌ ساقی مه‌یې باقی که‌ جه‌ننه‌ته‌نه‌ میېزیۆ
قه‌راخ ئاۉو رؤکناۉای و سێر و گوڵگه‌شتو موسه‌للای
فه‌غان که‌ ئی کولیه‌ شؤخ و شیرین کار و شارئاشوې
پاسه‌ سه‌برشا جه‌ دڵ به‌رد که‌ که‌ ترکې خوانو یه‌غمای
به‌شقی ناته‌مامو ئېمه جه‌ماڵو یاری بې باکا
به‌ ئاۉ و ڕه‌نگ و خاڵ و خه‌ت چ نیازېۉش هه‌ن ڕوې زیبای
من چا حوسنه‌ ڕؤ ئه‌فزونیه‌ که یؤسفی بېش زانېنې
ڕۉېۉ ئه‌شق جه‌ په‌رده‌و عسمه‌تی به‌رکېشؤنه‌ به‌ر زڵېخای
ئه‌ر دژمانی ده‌ی ئه‌ر نفرین من دایمه‌ دؤعا گؤوه‌نا
جوابی تاڵ وه‌ش ڕازنؤۉه‌ له‌بی لاڵینی شه‌که‌رخای
نه‌سېحه‌ت گؤش که‌ره‌ گیانه‌ که‌ جه‌ گیانی وه‌شته‌ر داراش
جوانی سه‌عاده‌تمه‌ندې ئه‌نده‌رز و ڕاو پیری دانای
حه‌دیس جه‌ مه‌ی و موترېبی باره‌ ڕازه‌و ده‌هری که‌مته‌ر جوه‌
به‌ حکمه‌ت که‌سی نه‌که‌ردۆ و مه‌که‌رؤۉه‌ ئی موعه‌ممای
غه‌زه‌ڵه‌ت ۉاته‌ و دوڕ سمای ئیسه‌ بؤ و وه‌ش بوانه‌ حافز
که‌ به‌ به‌زمو تؤ ئه‌فشانؤ فه‌ڵه‌ک مله‌ۉانه‌و سوره‌یای

ـــــــــــــــــــــــــ
٢
سه‌ڵاحو کاری چکؤ و منی خراب چکؤ
فه‌رقو ڕێ بدیه‌ که‌ چکؤۉه‌ن تا بکؤ
دڵم جه‌ سۆمعه‌ی و خه‌رقه‌و سالوسی گیریا
چکؤن ده‌یرو مؤغانی و شه‌رابی ناب چکؤ
سه‌لاح و ته‌قوێ کامه‌ نسبه‌تشانه‌ به‌ ڕندی
سه‌ماع و وه‌عز چکؤ ئاهه‌نگ و ره‌باب چکؤ
جه‌ چاره‌و دؤسی دڵو دژمه‌نا چېش میاۉؤنه‌
چراۉی مه‌ردې چکؤ و شؤڵه‌ ئافتاب چکؤ
که‌ کڵو دیده‌و ئېمه‌ خاکو ئاستانه‌و شمه‌ن
چکؤ بېزمېۉه‌ فه‌رماۉه‌ چون ئینه‌ جه‌ناب چکؤ‌
مه‌دیه‌ په‌ی ساۉه‌و زنجی که‌ چاڵی ئیناره‌ رانه‌
ئی سه‌خته‌ چکؤ ئه‌ی دڵ ئا هه‌ڵه‌ و شتاب چلؤ
لۉا و یادی وه‌شش بؤ ڕؤزگارو وساڵی
داخؤ کرشمه‌ چکؤ وڵاۉیا و عېتاب چکؤ
حافز و وه‌رم و قه‌رار ناڕاس ته‌مانه‌ ئه‌ی دؤس
قه‌رار چېش سه‌بوری کام پشو که‌ی و خاب چکؤ
ـــــــــــــــــــــ

١ـ
ئامان ساقی گېڵنه‌ کاسېۉ ده‌م په‌نه‌ سینه‌م وڵوڵا
عه‌شق ئه‌ۉه‌ڵ ئاسان ئه‌رمانې که‌چی کۆت‌ دلې موشکڵا
په‌ی‌ بۉه‌و نافېۉی که‌ سه‌با چا زڵفا که‌رؤۉه و بارؤ‌
جه‌ شؤکه‌و چه‌مه‌رو زڵفاش چ ونېۉه‌ مجیانه‌ دڵا
من مه‌نزڵه‌و گیانانه‌ کام ئه‌منو عه‌یشیما که‌ هه‌ر ده‌م
زه‌نگی هاۉارېشه‌نې که‌ ئاده‌ی بیندی ئا مه‌حملا
مازڵؤخ به‌ مه‌ی ره‌نگین که‌ره‌ ئه‌ر پیرو مؤغانی ماچؤ
که‌ سالک بې خه‌به‌ر نیا جه‌ ‌ڕاگه‌و ڕه‌سمو مه‌نزڵا
شه‌ۉه‌ی تاره‌ و ته‌رسه‌و مۆجې و چیمنه‌ گېجاۉه‌ی سامداره
‌چکؤ مزانا حاڵو ئېمه‌ سوکبارې ته‌خته‌ ساحلا
گرد کارېۉم جه‌ وېکامی به‌ به‌د نامی یاۉا ئاخر
نه‌هان که‌ی مه‌نؤ رازېۉه‌ که‌ بؤ‌ به‌ مایې مه‌حفلا
گه‌ر به‌ نیازو حزوریه‌نی دور مه‌گنۆ چه‌نه‌ش حافز
که‌یېۉ یاۉای لا وه‌شه‌سیای ده‌چؤر دنیای که‌ مېمڵا

Advertisements